Gott samstarf skiptir öllu máli

Fyrirtæki ánægðust með stafrænar lausnir

Viðskiptavinir okkar eru sem fyrr ánægðir með þjónustuna, samkvæmt því sem fram kemur í könnunum Gallup á fyrirtækjamarkaði. Fyrirtæki í viðskiptum við Landsbankann eru þau sem eru ánægðust með þjónustu síns aðalviðskiptabanka. Þá fá sjálfsafgreiðslulausnirnar okkar hæstu einkunn viðskiptavina bankanna og við finnum fyrir mikilli ánægju með þær. Viðskiptavinir okkar voru enn fremur ánægðastir af viðskiptavinum stóru bankanna þriggja með viðbrögð Landsbankans við heimsfaraldri Covid-19.

Stafræn þróun og viðbrögðin við efnahagslegum afleiðingum Covid-19 hafa verið umfangsmestu verkefnin okkar síðastliðin tvö ár og það gleður okkur mjög að viðskiptavinir skuli vera ánægðir með hvernig við leystum úr þeim.

Við fjöllum nánar um stafrænar lausnir í kaflanum um snjallari bankaþjónustu.

Hægt að gera flest í appinu

Undanfarið höfum við lagt sérstaka áherslu á að fjölga möguleikum fyrir fyrirtæki í appinu og nú er svo komið að minni og meðalstór fyrirtæki geta notað það til að sinna stærstum hluta sinna bankaviðskipta. Við einfölduðum einnig skráningarferlið og það hefur aldrei verið eins auðvelt fyrir fyrirtæki að koma í bankaviðskipti hjá okkur. Góð þjónusta og framúrskarandi stafrænar lausnir hafa spurst út. Aldrei áður hafa fleiri fyrirtæki komið í viðskipti við bankann og á árinu 2021 bættust tæplega 2.500 fyrirtæki og einyrkjar í hópinn. Af þeim komu um 90% í viðskipti í gegnum sjálfsafgreiðslu.

Markaðshlutdeild bankans meðal fyrirtækja sem skila ársreikningi var 33,6% í lok árs 2021, samkvæmt gögnum og viðmiðum bankans.

Stafræn þjónusta og persónuleg ráðgjöf

Fyrirtækin sem eru í viðskiptum við Landsbankann eru fjölbreytt. Þau eru bæði stór og smá og staðsett um allt land. Við viljum einfalda viðskiptavinum okkar lífið með því að gera þeim kleift að sinna sínum bankaviðskiptum í appinu eða netbankanum þegar þeim hentar. Ef viðskiptavinir þurfa aðstoð er öflugur hópur sérfræðinga til þjónustu reiðubúinn í Þjónustuveri fyrirtækja. Enn fremur geta fyrirtæki reitt sig á trausta ráðgjöf fjölda viðskiptastjóra og annarra sérfræðinga með mikla þekkingu og tengsl við atvinnulífið.

Við leggjum mikið upp úr traustu viðskiptasambandi, persónulegri ráðgjöf og samvinnu til langs tíma. Með því að gera vörur okkur og þjónustu enn aðgengilegri í gegnum netbankann og appið skapast meira svigrúm og tími fyrir persónlega og faglega ráðgjöf um stóru málin. Við finnum að fyrirtæki kunna að meta þessa stefnu.

Vel heppnuð hlutafjárútboð

Fyrirtækjaráðgjöf bankans náði mjög góðum árangri og annaðist eða tók þátt í mörgum vel heppnuðum verkefnum. Í maí sáum við um almennt hlutafjárútboð Síldarvinnslunnar hf. og skráningu félagsins á Aðallista Kauphallarinnar og vorum að vonum ánægð með rúmlega tvöfalda eftirspurn í útboðinu. Um 6.500 nýir hluthafar bættust í hluthafahópinn og keyptu hlutabréf í félaginu fyrir 29,7 milljarða króna. Við tókum einnig þátt í framkvæmd á hlutafjárútboði Íslandsbanka hf. í júní sl. Þá bættust um 24.000 nýir hluthafar við og keyptu nýtt hlutafé fyrir um 55 milljarða króna en í því tilfelli var eftirspurnin níföld.

Fyrirtækjaráðgjöf Landsbankans var ráðgjafi við framkvæmd nýtingar áskriftarréttinda Icelandair, sá um vel heppnuð skuldabréfaútboð fyrir ýmis félög og hafði umsjón með útgáfu og töku skuldabréfa þeirra til viðskipta í Kauphöll.

Fyrirtækjaráðgjöf var ráðgjafi Regins hf. í viðskiptum um fasteignaþróunarfélag með Klasa ehf. og Högum hf. Reginn og Hagar undirrituðu samning um áskrift að hlutafé í fasteignaþróunarfélaginu Klasa. Með samningnum eignast Reginn þriðjung hlutafjár í Klasa og munu félögin ganga til samstarfs um frekari uppbyggingu Klasa og dótturfélaga þess. Á meðal markmiða þeirra er að leggja áherslu á sjálfbærni við þróun og uppbyggingu eigna félaganna. Hið sameinaða félag mun geta stutt við fjölbreytta og sjálfbæra borgarþróun, þ.e. blöndu af fjölbreyttu atvinnu- og þjónustuhúsnæði og íbúðum.

Áhersla á sjálfbæra fjármögnun fyrirtækja

Við erum leiðandi í sjálfbærri fjármögnun og verkefnum á því sviði fer fjölgandi. Á árinu 2021 kynntum við sjálfbærnimerki Landsbankans sem fyrirtæki, sem eru með lán hjá okkur, geta óskað eftir. Til að fá merkið þarf verkefnið sem fjármagnað er að uppfylla skilyrði um sjálfbærni og falla undir einn af þeim ellefu verkefnaflokkum sem tilgreindir eru í sjálfbærri fjármálaumgjörð bankans. Dæmi um sjálfbær verkefni eru til að mynda orkuskipti í samgöngum, endurnýjanleg raforkuframleiðsla, sjálfbærnivottaðar fiskveiðar, vistvænar byggingar og verkefni sem stuðla að félagslegri uppbyggingu. Fyrsta fyrirtækið til að hljóta sjálfbærnimerkið var Útgerðarfélag Reykjavíkur og síðar á árinu bættust Orka náttúrunnar og Ljósleiðarinn í hópinn.

Fjármögnum fleiri óhagnaðardrifin verkefni

Landsbankinn hefur verið leiðandi í mannvirkjafjármögnun á undanförnum árum. Við höfum lagt áherslu á að eiga tíð samskipti við viðskiptavini okkar með það að leiðarljósi að skilja og greina þarfir þeirra.

Á árinu 2021 vorum við áfram umsvifamikil í greininni og fjármagnaði bankinn nýtt íbúðarhúsnæði bæði fyrir almennan markað og leigumarkað. Verkefnin eru víða um land, þó flest séu sem fyrr á höfuðborgarsvæðinu. Fjöldi nýrra byggingarverkefna sem bankinn fjármagnar er hafinn eða í undirbúningi. Framkvæmdafjármögnun vegna óhagnaðardrifinna verkefna hefur aukist verulega samfara miklum krafti í uppbyggingu leiguíbúða og uppbyggingu hagkvæmra íbúða fyrir fyrstu kaupendur.

Ný útlán til byggingarstarfsemi eru sveiflukennd og fara m.a. eftir því hversu hratt tekst að selja eignir. Sala íbúðarhúsnæðis á árinu 2021 var gríðarlega hröð og algengt að byrjað væri að selja eignirnar á byggingartíma. Þessi þróun olli því að þörf fyrir lánsfé minnkaði og þar með lækkuðu útlán til þeirra verkefna, þrátt fyrir að fyrir lægju hærri lánsloforð til verkefnanna.

Stöndum með ferðaþjónustunni

Við héldum áfram að vinna náið með viðskiptavinum við að fást við þær miklu breytingar sem faraldurinn hefur haft í för með sér.

Fyrirtæki sem tengjast ferðaþjónustunni með einum eða öðrum hætti hafa átt undir högg að sækja og hafa þurft að takast á við ófyrirsjáanlegar aðstæður og síbreytilegar ráðstafanir vegna Covid-19. Við höfum reynt eftir fremsta megni að koma til móts við ólíkar þarfir viðskiptavina í ferðaþjónustu og tryggja eins og framast er unnt að þau verði tilbúin til að takast á við aukinn ferðamannastraum þegar faraldrinum linnir.

Góður gangur í sjávarútvegi

Eftir miklar áskoranir og varnarbaráttu á árinu 2020 sóttu sjávarútvegsfélögin fram að nýju á árinu 2021. Fjárfestingar jukust og framleiðsla og sala gekk betur. Horfur eru jafnframt góðar fyrir næsta ár, sérstaklega hvað varðar loðnuveiðar og -vinnslu. Góður árangur varð einnig í fiskeldi og árið 2021 var metár í framleiðslu og sölu. Tækifæri til frekari vaxtar eru enn til staðar á næstu árum, bæði í sjó- og ekki síður landeldi.

Lán til sjávarútvegsfyrirtækja mynda að nýju stærsta lánasafn bankans, fyrir utan lán til einstaklinga. Velgengni í sjávarútvegi endurspeglast einnig í gæðum lánasafnsins en vanskil eru í lágmarki. Við leggjum hér eftir sem hingað til áherslu á að vaxa með viðskiptavinum okkar og styðja við þá í þeirra vegferð. Við erum vakandi fyrir þeim tækifærum sem upp koma í sjávarútvegi og viljum vera leiðandi í fjármálaþjónustu við íslensk sjávarútvegsfélög.

Miklar breytingar í verslun og þjónustu

Almennt gekk rekstur verslunar- og þjónustufyrirtækja vel á árinu 2021 en þessi félög hafa mætt miklum rekstraráskorunum síðastliðið ár. Innkaupa- og neysluvenjur fólks hafa gjörbreyst í faraldrinum með stórauknum netviðskiptum sem kallað hefur á miklar og hraðar breytingar hjá verslunar- og þjónustufyrirtækjum til að aðlagast breyttum aðstæðum. Við höfum verið leiðandi í viðskiptum við fyrirtæki í verslun og þjónustu og höfum staðið þétt við bakið á viðskiptavinum okkar á árinu.

Landbúnaðurinn hefur haldið velli í heimsfaraldrinum

Landbúnaðurinn hefur haldið velli í heimsfaraldrinum, framleiðsla gengið hnökralaust, sala gengið vel en markaðurinn breyst. Smásala jókst umtalsvert á árinu en sala til stórnotenda minnkaði.

Uppbygging og endurskipulagning heldur áfram í mjólkurframleiðslu. Framleiðendum í mjólk fækkar og þeim sem áfram halda hefur tekist að styrkja sig með kaupum á kvóta og fjárfestingu í aukinni sjálfvirkni. Framleiðsla á grænmeti gengur almennt vel og tækifæri eru til að gera enn betur með stækkun rekstrareininga og aukinni fjölbreytni afurða. Sem fyrr á sauðfjárbúskapur undir högg að sækja. Landbúnaður hefur alla tíð skipað stóran sess í starfsemi bankans og svo mun verða áfram. Við ætlum áfram að vera öflugur samherji bænda.