Helstu sjálfbærniverkefni

Sjálfbærnistefnan uppfærð

Við uppfærðum sjálfbærnistefnu okkar á árinu 2021. Stefnan kemur inn á öll svið bankans, skilgreinir helstu áherslur okkar í sjálfbærni og lýsir því hvernig við hyggjumst tileinka okkur þær í starfseminni.  Stefnan fjallar um heimsmarkmið Sameinuðu þjóðanna, loftslagsmál, félagslega þætti, stjórnarhætti, UFS-áhættumat, ábyrgar fjárfestingar og ábyrgar lánveitingar.

Áherslubreytingar í heimsmarkmiðum

Við fylgjum fjórum heimsmarkmiðum Sameinuðu þjóðanna um sjálfbæra þróun. Á árinu 2021 endurskoðuðum við hvaða heimsmarkmið samræmdust best rekstri bankans og studdumst við verkfærakistu Sameinuðu þjóðanna við vinnuna. Niðurstaðan var sú að breyta aðeins áherslunum og fjölga heimsmarkmiðunum sem við fylgjum úr þremur í fjögur. Markmiðin tengjast öll starfsemi bankans og því getur vinnan að þeim hámarkað jákvæð áhrif bankans á umhverfi og samfélag.

Við fylgjum einnig viðmiðum um ábyrga bankastarfsemi (PRB) sem hjálpa bönkum að vinna að heimsmarkmiðum Sameinuðu þjóðanna og Parísarsáttmálanum.

Sjálfbærnimarkmið Landsbankans

Markmið okkar í sjálfbærni voru endurskoðuð. Nánar má lesa um þau í kaflanum Sjálfbærniuppgjör.

Leiðandi í UFS-áhættumati Sustainalytics

Í UFS-áhættumati frá Sustainalytics í maí 2021 fengum við okkar bestu einkunn hingað til. Landsbankinn var fremstur meðal 423 sambærilegra banka sem fyrirtækið hafði mælt. Við lækkuðum úr 13,5 niður í 9,7 á skala sem nær upp í 100. Þetta þýðir að Sustainalytics telur hverfandi áhættu á að Landsbankinn verði fyrir fjárhagslegum áföllum vegna umhverfismála, félagslegra þátta og stjórnarhátta (UFS-þátta) sem eru þeir þættir sem skoðaðir eru í áhættumatinu.

Sjálfbær fjármálaumgjörð

Í janúar 2021 gáfum við út okkar fyrstu sjálfbæru fjármálaumgjörð. Umgjörðin er vottuð af Sustainalytics og myndar ramma um fjármögnun bankans á umhverfisvænum og félagslegum verkefnum. Hún byggir á viðmiðum Alþjóðasamtaka aðila á verðbréfamarkaði (ICMA) og nýlegum viðmiðum Evrópusambandsins (e. EU Taxonomy) um græna og félagslega fjármögnun.

Grænar skuldabréfaútgáfur

Á árinu 2021 gáfum við tvisvar út græn skuldabréf að fjárhæð 300 milljónir evra í hvort skipti. Grænar skuldabréfaútgáfur styðja við sjálfbærnivegferð okkar, skila gjarnan betri kjörum og ná til breiðari hóps fjárfesta.

Áhrifaskýrsla fyrir græn skuldabréf  (e. impact report)

Á árinu 2021 unnum við í útgáfu áhrifaskýrslu fyrir græn skuldabréf sem gefin var út rétt eftir áramót 2022. Þá voru þeim fjárfestum sem fjárfestu í grænum skuldabréfum bankans gefnar ítarlegar upplýsingar um nýtingu fjármagnsins og hvaða áhrif það hafði. Sustainalytics staðfesti að nýting fjármagns var í samræmi við sjálfbæra fjármálaumgjörð bankans.

Vaxtareikningur sjálfbær

Á árinu 2021 kynntum við til sögunnar nýjan sparireikning, Vaxtareikning sjálfbæran, þar sem innlánum er ráðstafað til fjármögnunar á verkefnum sem stuðla að sjálfbærni. Með þessum nýja sparireikningi geta viðskiptavinir okkar látið sparnaðinn hafa góð áhrif á umhverfi og samfélag. Reikningurinn styðst við sjálfbæru fjármálaumgjörðina okkar.

Eignadreifing sjálfbær

Nýr fjárfestingarsjóður Landsbréfa, Eignadreifing sjálfbær, leit dagsins ljós á árinu 2021 en sjóðurinn skoðar áhrif á UFS-þætti við fjárfestingarákvarðanir sínar. Nú bjóðast viðskiptavinum okkar því fleiri fjárfestingarkostir sem samræmast aðferðafræði ábyrgra fjárfestinga. 

Nýtt sjálfbærnimerki bankans: Sjálfbær fjármögnun fyrirtækja

Við bjóðum fyrirtækjum upp á sjálfbæra fjármögnun. Þegar fyrirtæki uppfyllir skilyrði fyrir slíkri  fjármögnun getur það fengið sjálfbærnimerki Landsbankans. Útgerðarfélag Reykjavíkur varð árið 2021 fyrsta fyrirtækið til að fá merkið í tengslum við fjármögnun bankans á MSC-vottuðum fiskveiðum. Í lok árs fékk Orkuveita Reykjavíkur merkið vegna framleiðslu á rafmagni og hita með lágu kolefnisspori, sem og Ljósleiðarinn vegna uppsetningar og rekstrar ljósleiðara.

Við þekkjum losun frá útlánum okkar

Á árinu 2021 áætluðum við losun gróðurhúsalofttegunda frá útlánum okkar með aðferðafræði PCAF og birtum opinberlega, fyrst íslenskra fjármálafyrirtækja. PCAF stendur fyrir Partnership for Carbon Accounting Financials og hefur það markmið að samræma mat á umfangi losunar fjármálafyrirtækja í gegnum lánveitingar og fjárfestingar. Þetta er stórt skref, því helsta áskorun banka í loftslagsmálum hefur verið að meta óbein umhverfisáhrif sín. Við teljum mikilvægt að þekkja kolefnisspor okkar til hlítar en einungis 1% af kolefnislosuninni er vegna reksturs bankans.

Leiðandi í alþjóðlegri þróun PCAF

Sérfræðingar okkar taka þátt í að leiða þróun á alþjóðlegri aðferðafræði PCAF, samstarfsvettvangi fjármálafyrirtækja, en aðferðafræðin gerir fjármálafyrirtækjum kleift að meta óbein umhverfisáhrif sín og setja tölfræðina fram á samræmdan hátt. Sérfræðingar okkar hafa tekið virkan þátt í verkefninu frá upphafi og verið leiðandi í samstarfinu. Um 170 fjármálafyrirtæki og fjárfestar hafa nú skuldbundið sig til að nota aðferðafræðina við mat á óbeinum umhverfisáhrifum sínum.

Starfsemin áfram kolefnisjöfnuð

Við endurnýjuðum hina alþjóðlega viðurkenndu CarbonNeutral® vottun og höfum kolefnisjafnað hefðbundna starfsemi bankans fyrir árið 2021. Í samstarfi við Natural Capital Partners kolefnisjöfnum við starfsemi bankans með bindingu eða minnkun á losun gróðurhúsalofttegunda. Sú binding er vottuð samkvæmt ströngustu alþjóðlegu stöðlum og hefur þegar átt sér stað.

Fyrsta sjálfbærniskuldabréfið gefið út hérlendis

Við unnum með sveitarfélaginu Árborg að útgáfu fyrsta sjálfbærniskuldabréfsins sem gefið var út á Íslandi. Landsbankinn var ráðgefandi í ferlinu frá upphafi og í gegnum allt ferlið.

Ábyrgar fjárfestingar og ábyrgar lánveitingar

Við höfum lengi lagt áherslu á ábyrgar fjárfestingar, enda hefur sú aðferðafræði jákvæð áhrif á ávöxtun fjárfestinga til lengri tíma og dregur úr rekstraráhættu. Í okkar starfi höfum við til hliðsjónar leiðbeiningar Sameinuðu þjóðanna um ábyrgar fjárfestingar (UN PRI) og gefum árlega út framvinduskýrslu. Við viljum einnig  vera í fararbroddi hvað varðar ábyrgar lánveitingar þar sem þær draga úr rekstraráhættu fyrirtækja. Sjá nánar í sjálfbærnistefnu bankans.

Skýrari kröfur til birgja

Í lok árs 2021 lauk vinnu við að útbúa sáttmála sem birgjar bankans koma til með að skrifa undir. Með sáttmálanum skuldbinda birgjarnir sig til að tryggja að mannréttindi og félagafrelsi sé virt í eigin starfsemi og hjá undirverktökum; einnig að unnið sé gegn spillingu. Sáttmálinn byggir á hinum tíu viðmiðum hnattræns samkomulags Sameinuðu þjóðanna (e. Global Compact).

Fyrirmyndarfyrirtæki í góðum stjórnarháttum

Landsbankinn hefur verið fyrirmyndarfyrirtæki í góðum stjórnarháttum frá 2014 en viðurkenningin byggir á úttekt á stjórnarháttum bankans. Við ætlum að vera til fyrirmyndar í stjórnarháttum og fylgjum leiðbeinandi reglum Kauphallarinnar, Viðskiptaráðs og Samtaka atvinnulífsins þar um.

Mikil áhersla á netöryggismál

Netöryggismál eru alltaf  í brennidepli hjá okkur. Við lítum á víðtæka fræðslu um netöryggi sem hluta af samfélagsábyrgð okkar. Á árinu 2021 tóku sérfræðingar bankans virkan þátt í umræðu um netöryggismál í fjölmiðlum og við birtum reglulega fræðslugreinar um málefnið á vefnum okkar og á samfélagsmiðlum.

Virk í samfélagsumræðunni

Sérfræðingar okkar taka ríkan þátt í samfélagsumræðunni um sjálfbærni og samfélagsábyrgð. Á árinu 2021 birtum við fjölda greina um málefnið á vef okkar og á samfélagsmiðlum, auk þess sem sjálfbærnisérfræðingar okkar voru áberandi á vettvangi sjálfbærni.